我好衝忙咁喺灣仔開完會議，然後坐港鐵去屯門，再轉輕鐵去到景田，參加三位年輕帥哥新外賣壽司店嘅開幕禮。時間係 11 月 14 日嘅中午， Rocky 話佢哋預備咗一隻中燒豬，會等埋我到場先至舉行傳統嘅切燒豬儀式，我真係有啲唔好意思，好彩行程都算順利，最後只係遲咗幾分鐘，「鮨戶」Sushi To 嘅主人家就興高采烈咁介紹在場佢嗰兩位合夥人俾我識。
時光倒流到兩星期前， Rocky 話收到 in-bound 回應，有一快開壽司店的店主想睇 Demo ，地點較遠，安排咗同我一齊去。好唔容易先至搵到呢個舖位，係頂手嘅舊舖，店主正係好投入咁參與改裝工程，彷彿連裝修都自己落手落腳，真係唔簡單！
Rocky 好敏捷咁完成咗 iCHEF 系統嘅 Demo ，解答咗好多操作系統嘅問題，仲細節咁研究咗現場安裝嘅線路走位，跟住落嚟就好客氣咁請佢喺附近搵一間茶餐廳坐低繼續傾，其實已差不多下午四點，我哋仲未有機會食午飯！
呢個下午茶聚諗唔到會變成我哋同呢個年輕人嘅交心時間，佢提到以往打工經驗、點解對日本料理情有獨鍾、同合夥人點樣決定喺呢個極具挑戰嘅環境下一齊去追求夢想，我亦老實不客氣咁分享自己同埋朋友合資開西式餐廳嘅痛苦教訓，但鼓勵佢哋要努力勇往直前！
一星期後收到佢所有障礙都已經排除曬嘅消息，仲約好時間俾我哋去店舖安裝 iCHEF 系統。當收到出席新店開幕禮嘅邀請嗰陣，我同 Rocky 二口同聲咁話一定會去！相信這位帥哥係真心希望見到我哋喺佢嘅親友面前以行動鼓勵同支持佢！
2022 年 11 月 27 日