學生媽媽嘅心聲|Uncle David 由東涌出發

對我來講,呢一幕相當感人,喺我參與統籌同推出保良局特殊學校學生利用 iCHEF 系統學習餐飲顧客服務嘅合作計劃𥚃面,諗唔到會咁快出現呢個場面!喺提升社會責任嘅意識方面添加咗好大嘅正能量,最終得益嘅係我哋自己。

對我來講,呢一幕相當感人,喺我參與統籌同推出保良局特殊學校學生利用 iCHEF 系統學習餐飲顧客服務嘅合作計劃𥚃面,諗唔到會咁快出現呢個場面!

經過咗學校一位主任同我哋合作做訓練學生,兩個半月嚟每星期一次喺課室做基本迎賓、點餐、送餐、埋單等練習同埋去真正咖啡店做實習之後 ( 睇吓連結短片 ) 我哋膽粗粗同學校一齊去「 創意文化及科技創新展覽 2022 」參展,受過訓練的學生分批去到展覽攤位做實習,顧客對象係一般入場賓客,接受我哋邀請參加角色扮演,佢哋都感到有意義,好開心幫到手!


參加實習嘅學生屬於中度智障嘅一群,其中包括唐氏綜合症患者,經過學校多年來嘅栽培,已經具備有效嘅生活同埋工作能力,佢哋期待不久之後可踏入就業市場。有兩位媽媽特登過嚟現場觀察同埋分別支持自己個女。

佢哋講比我聽嘅嘢代表咗一群家長嘅心聲:「 由佢出世嗰日一直到佢六歲,我都好難過又怕比人知道我有個咁嘅女,日日將佢擺埋喺房𥚃面,自己就經常喊,好傷心!佢六歲嗰年入咗呢間特殊學校,所有嘅嘢就開始有變化,見到今天佢喺度嘅表現,我真係好開心,非常多謝你哋商界比到學校嘅支持。 」

繼續傾談嗰陣佢哋提到呢兩個女感情好好,經常約埋一齊去街。其中一位問我介唔介意佢個女成日咁多嘢講,「 好嘈!」我話佢講嘢好叻,好識得表達自己嘅感受,溝通能力相當好,係佢嘅強項。

同 Rocky 同埋其他 iCHEF 隊員回顧兩位媽媽嘅說話嗰陣,感覺到大家過去幾個月一齊參與保良局學校計劃,喺提升社會責任嘅意識方面添加咗好大嘅正能量,最終得益嘅係我哋自己。 iCHEF ,加油!

2022 年 11 月 27 日

iCHEF CLUB
iCHEF CLUB
文章: 32

發佈留言

發佈留言必須填寫的電子郵件地址不會公開。 必填欄位標示為 *