第一次 Rocky 同我去做呢個回訪 iCHEF 客戶帶嚟意想不到嘅驚喜。去到大埔大元商場對面嘅運動場，落去地庫搵到 Bulldog Hot Dog 熱狗店，即刻睇菜單同埋點餐飲，幾分鐘後老闆迎面而來歡迎我哋，仲帶我哋經過一道門去到一個拳館，旁邊設有一排卡位，我哋就揀咗其中一張坐。
傾談中了解到拳館係佢原來嘅生意，自己都要參賽，打過 10 場，兩三年前體會到再過幾年體力一定不夠，唔可以繼續參賽同埋教拳擊，把心一橫同朋友合夥開熱狗店，出品高價、高質素嘅特式熱狗，仲有陸續開分店嘅鴻圖大計，但我哋感覺到目前經濟環境下佢承受緊嘅壓力。
傾傾下熱狗套餐送到卡位，熱狗腸同埋麵包都比慣常食過嘅大 30% ！腸肉質鮮、香脆又鹹度適中，麵包烤到柔軟、香脆，醬汁味道亦恰到好處，我哋不約而同講左句「配搭完美」！店主聽到評語喜上眉梢，回應喺研發方面出咗好多力，麵包用料配方係佢自創，再交俾麵包廠專門製造。 Rocky 立刻叫多一份外賣帶返屋企俾家人試！
感受到到經營壓力，臨走前我打開話題，問想我哋點樣幫到佢？幾個計劃就由這一句話開始，跟住落嚟幾個星期我哋一連串咁幫佢建立咗同其他 iCHEF 老闆嘅餐品 Crossover ，速成佢哋之間互相借力，達到雙贏！已經見過面相談嘅包括：牛腩王供應細切腩肉配入熱狗，變成牛腩熱狗；歷史悠久嘅食品名牌運送冷藏熱狗到零售店；發展較小的熱狗俾特殊學校裡面嘅模疑快餐店，並訓練老師點樣教導學生做熱狗製作等！呢啲 Crossover 項目已進入咗準備執行階段，希望好快會有成果。
2022 年 12 月 4 日